“Эх орондоо хөдөлмөр эрхэлцгээе" хөдөлмөрийн яармаг болно

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн 4.6.6-д “гадаадад сурч, ажиллаж хөдөлмөрлөж байсан залуучуудыг дэмжиж, ажлын байраар хангах, хамтран ажиллах төсөл, хөтөлбөрийг хэрэгжүүлэх”, Нийслэлийн иргэдийн Төлөөлөгчдийн Хурлын Тэргүүлэгчдийн хурлаар 2017 оны 158 дугаар тогтоолоор батлагдсан “Нийслэлийн Залуучууд” дэд хөтөлбөрийн 3.2.7-д “гадаад болон дотоодод сурч боловсрон, нарийн мэргэжил эзэмшсэн залуучуудын хөдөлмөр эрхлэлтийг дэмжих үйл ажиллагаа зохион байгуулах” зорилтыг хангахаар “Эх орондоо хөдөлмөр эрхэлцгээе” хөдөлмөрийн үзэсгэлэн, яармагийг 2018 оны 09 дүгээр сарын 14-ний өдрийн 13:00-17:00 цагийн хооронд МҮХАҮТ-ын Их тамхимд зохион байгуулна.

Тус хөдөлмөрийн үзэсгэлэн яармагийг Гадаад харилцааны яам, Нийслэлийн Залуучуудын хөгжлийн газар, Монголын Үндэсний Худалдаа Аж Үйлдвэрийн Танхим (МҮХАҮТ), “Хилийн чанад дахь Монголчуудын зөвлөл” ТББ, “Гадаадад Төгсөгчдийн Нэгдсэн Зөвлөл” ТББ, хүний нөөцийн чиглэлээр үйл ажиллагаа явуулдаг “Шинэ хөгжлийн түлхүүр” (MSDI) ТББ-ууд хамтран зохион байгуулах юм.

“Эх орондоо хөдөлмөр эрхэлцгээе” хөдөлмөрийн үзэсгэлэн яармагийн үеэр  үндэсний тэргүүлэгч 50 аж ахуй нэгж, байгууллагууд нээлттэй 500 ажлын байр зарлаж, эх орондоо хөдөлмөр эрхлэх боломж ба тулгамдаж буй асуудлаар мэдээлэл хийж, нээлттэй ярилцлага өрнүүлэн, гадаадад төгсөгчид болон хилийн чанадад амьдарч буй иргэд эргэн ирэхэд хөдөлмөр эрхлэх боломж, нөхцөл байдлын талаар харилцан санал солилцож, хүний нөөцийн чиглэлээр зөвлөх үйлчилгээ үзүүлдэг 6 байгууллага мэдээлэл өгнө.

Энэхүү хөдөлмөрийн үзэсгэлэн яармагт гадаадад суралцаж, ажиллаж амьдарч байгаагүй залуучууд ч оролцох боломжтой юм.

Эх орныхоо хөгжил, гадаад сурталчилгаанд нэгдсэн бодлогоор хувь нэмэр оруулж, төрийн байгууллагуудтай нэгдсэн сувгаар харилцаж, хамтран ажиллах зорилготой “Хилийн чанад дахь Монголчуудын зөвлөл” ТББ нь 39 улсад үйл ажиллагаа явуулдаг 158 төрийн бус байгууллагын төлөөллийг нэгтгэсэн байгууллага юм. Тус хөдөлмөрийн үзэсгэлэн яармагт “Хилийн чанад дахь Монголчуудын зөвлөл” ТББ-ын гишүүд, төлөөлөгчид оролцох юм байна.

Мөн “Гадаадад Төгсөгчдийн Нэгдсэн Зөвлөл” ТББ нь 8 улсын гадаадад их, дээд сургуульд төгсөгчдийн холбоог нэгтгэн үйл ажиллагаа явуулдаг бөгөөд тус холбоодын гишүүд хөдөлмөрийн үзэсгэлэн яармагт оролцох юм.

“Шинэ хөгжлийн түлхүүр” (MSDI) ТББ нь Монгол Улсын хөдөлмөрийн зах зээл дээр 2013 оноос эхлэн үйл ажиллагаагаа явуулж эхэлсэн бөгөөд өнөөдрийн байдлаар 120 гаруй аж ахуй нэгж, байгууллагуудтай хамтран ажиллаж байна. Тус байгууллага нь ажилд холбон зуучлахаас гадна хүний нөөцийн чиглэлээр сургалт, аутсорсинг, аудитын үйлчилгээг үзүүлдэг.

Төр, хувийн хэвшлийн түншлэлийг дэмжих чиглэлээр гадаад, дотоодын байгууллагуудыг мэдлэг, чадвартай боловсон хүчнээр хангах, гадаадад ажиллаж, амьдарч байсан иргэдийн мэдлэг, туршлагыг эх орондоо нутагшуулах зорилгоор Нийслэлийн Засаг даргын хэрэгжүүлэгч агентлаг Залуучуудын хөгжлийн газар, “Хилийн чанад дахь Монголчуудын зөвлөл” ТББ, “Гадаадад Төгсөгчдийн Нэгдсэн Зөвлөл” ТББ-ууд гурван талт санамж бичиг байгуулан цаашид энэ чиглэлээр олон талт үйл ажиллагааг хамтран зохион байгуулахаар боллоо гэж нийслэлийн Залуучуудын хөгжлийн газраас мэдээллээ.

ХӨТӨЛБӨР

Бүртгэл                             13:00 – 17:00

Нээлт  /Төрийн дуулал/    14:00 – 14:05

Нээлтийн үг                      14:05 – 14:10

Нийслэлийн Засаг даргын хэрэгжүүлэгч агентлаг Залуучуудын хөгжлийн газрын дарга С.Сүх-Очир

Мэндчилгээ                      14:10 – 14:40

Монгол Улсын Гадаад харилцааны яамны төлөөлөл

Монголын Үндэсний Худалдаа Аж Үйлдвэрийн Танхимын төлөөлөл

 “Хилийн чанад дахь Монголчуудын зөвлөл” ТББ-ын Тэргүүн Э.Номун-Эрдэнэ

 “Гадаадад Төгсөгчдийн Нэгдсэн Зөвлөл” ТББ-ын Ерөнхий нарийн бичгийн дарга.А.Хосхүү

“Шинэ хөгжлийн түлхүүр” (MSDI) ТББ-ын Гүйцэтгэх захирал Н.Амаржаргал

Нээлттэй мэдээллийн цаг 14:40-15:40

Эх орондоо хөдөлмөр эрхлэх, тав тухтай амьдрах боломж ба тулгамдаж буй асуудлаар мэдээлэл хийж, нээлттэй ярилцлага өрнүүлэн, гадаадад төгсөгчид, мөн аж төрж буй иргэд эргэн ирэхэд хөдөлмөр эрхлэх боломж, нөхцөл байдлын талаар харилцан санал солилцож, зөвлөгөө, мэдээлэл өгнө.

 

Нийслэлийн залуучуудын хөгжлийн газар

 

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна