НҮБ-ЫН ХҮҮХДИЙН САНГААС ЭМЭГТЭЙЧҮҮДИЙН ЭСРЭГ ЦАХИМ ХҮЧИРХИЙЛЭЛТЭЙ ТЭМЦЭХЭД ХАМТРАН АЖИЛЛАХАД БЭЛЭН БАЙГААГАА ИЛЭРХИЙЛЭВ
2022-05-13 10:00

Улсын Их Хурал дахь эмэгтэй гишүүдийн бүлгийн төлөөлөл болох УИХ-ын дэд дарга С.Одонтуяа, УИХ-ын гишүүн Б.Жаргалмаа, Б.Саранчимэг, Б.Баярсайхан, Ч.Ундрам нар өчигдөр (2022.05.12) Монгол Улсад НҮБ-ын Хүүхдийн сангийн Зүүн Ази, Номхон далайн бүсийн захирал хатагтай Дебора Коминитэй уулзаж, хамтын ажиллагааны талаар санал солилцлоо. 

НҮБ-ын Хүүхдийн сангийн Зүүн Ази, Номхон далайн бүсийн захирал хатагтай Дебора Комини хэлэхдээ, эмэгтэйчүүдийн эсрэг хүчирхийлэл нь эмэгтэйчүүдийг тэгш эрхээ эдлэхэд нь аюул заналхийлэл, саад бэрхшээл учруулж байгаагийн нэг том жишээ бол цахим орчин дахь хүчирхийлэл юм. Иймд цахим хүчирхийллээс урьдчилан сэргийлэх, тэмцэхэд хамтран ажиллахад бэлэн байгаагаа илэрхийлэв. Түүнчлэн, уур амьсгалын өөрчлөлт сүүлийн хэдэн арван жилийн турш улс орны хөгжлийг сааруулж, эрсдэлийг нэмэгдүүлэх хүчин зүйл болоод байгаа тул залуусын оролцоог нэмэгдүүлэх, тэднийг чадавхжуулах санаачилга гаргав.

зураг

 

Гишүүдийн зүгээс охид, эмэгтэйчүүдийн эсрэг хүчирхийллийг таслан зогсоох, байгаль орчин, ногоон хөгжил, мөн хөгжлийн бэрхшээлтэй хүүхдийн эрхийг хангах зэрэг асуудлаар НҮБ-ын Хүүхдийн сантай хамтран ажиллахад бэлэн гэв. 

УИХ-ын дэд дарга С.Одонтуяа “Улсын Их Хурал дахь эмэгтэй гишүүд Хүүхэд хамгааллын тухай хууль болон Гэр бүлийн тухай хуулийг шинэчлэх шаардлагатай гэж үзэж байна. Мөн хүүхдийг цахим халдлагаас хамгаалах тухай олон улсын туршлагаас судалж, НҮБ-ын Хүүхдийн сантай хамтран ажиллах сонирхолтой байгаагаа илэрхийлэв гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.