Сэлэнгэ аймгийн Жавхлант, Хэнтийн Батноров, Дорнодын Матад суманд өчигдөр (2024.04.09) хээрийн түймэр гарлаа.

Тухайлбал, Дорнод аймгийн Матад сумын Буян-Өндөр багийн “Өлзийт” гэдэг газар хээрийн гал түймэр гарсан тухай дуудлага Онцгой байдлын албанд тухайн өдрийн 18:55 цагт иржээ.

Дуудлагын дагуу тус аймгийн Матад суманд байрлаж байгаа Онцгой байдлын газрын алба хаагчид, “Петро-Чайна Дачин Тамсаг” ХХК-ийн 19 дүгээр талбайн ажилтнууд 21:20 цагт түймрийг бүрэн унтраасан байна. Урьдчилсан байдлаар түймэрт 700 га талбай өртөж шатжээ.

Хээрийн түймрээс урьдчилан сэргийлж:

• Асаасан гал, чүдэнз, татсан тамхиа бүрэн унтраах,
• Ил задгай гал түлэхгүй, татсан тамхины иш, чүдэнзийг ил хаяхгүй байх,
• Үнс нурмаа ухсан нүх, тагтай битүү саванд хийж занших,
• Хавар, намрын улиралд өвс ихтэй газраар автомашин, мотоцикл зорчихгүй байхыг хичээх,
• Түймэр гарсан тохиолдолд Онцгой байдлын алба болон орон нутгийн Засаг захиргаанд яаралтай мэдээлэх шаардлагатай.

Эх сурвалж: ОБЕГ-ын Урьдчилан сэргийлэх газар