fitness
  • 192 үзэлт
  • 0 сэтгэгдэл
  • 2024-01-24

Монгол Улсад хүчин төгөлдөр мөрдөж буй Газар өмчлүүлэх тухай хуулийн агуулга, зохицуулалтыг үндэслэн газар өмчлөх, эзэмших, ашиглах эрхийн ялгааг тайлбарлан хүргэж байна. Газрын эрх зүйд газар өмчлөх, эзэмших, ашиглах гэсэн ойлголтууд байх бөгөөд иргэдийн дунд эдгээр ойлголтыг хольж солих тохиолдол их байдаг аж.

ГАЗАР ӨМЧЛӨХ

Газрыг захиран зарцуулах эрхтэйгээр өөрийн мэдэлд байлгаж, ашигтай шинж чанарыг гаргаж хэрэглэхийг хэлнэ. Захиран зарцуулах эрх гэдэг нь түүнийг бусдад худалдах, бэлэглэх, өвлүүлэх, арилжих, барьцаалах зэргийг ойлгоно. Газар өмчлөх эрх нь субьектын хувьд зөвхөн Монгол Улсын иргэн, төрд хамааралтай юм. Монгол Улсын Үндсэн хуулийн 6 дугаар зүйлийн 6.3 дах хэсэгт иргэд газраа захиран зарцуулах эрхээ харьяалгүй хүн, гадаадын иргэнд шилжүүлэхийг хориглосон байдаг. Өөрөөр хэлбэл гадаадын иргэн, харьяалалгүй этгээд болон аливаа хуулийн этгээд нь Монгол улсад газар өмчлөх боломжгүй юм.

ГАЗАР ЭЗЭМШИХ

Газрыг гэрээнд заасан зориулалт нөхцөл болзлын дагуу хуулиар зөвшөөрсөн хүрээнд өөрийн мэдэлд байлгахыг хэлнэ. Газар эзэмших эрх нь газар ашиглах эрхийг өөртөө давхар агуулж байдаг ойлголт юм. Энэ нь субьектын хувьд Монгол Улсын иргэн, аж ахуйн нэгж байгууллагад хамаатай.

ГАЗАР АШИГЛАХ

Хуулиар зөвшөөрсөн хүрээнд газар өмчлөгч, эзэмшигчтэй байгуулсан гэрээнд заасны дагуу аль нэг ашигтай чанарыг нь гаргаж хэрэглэхийг хэлнэ.

Үндсэн хуулийн 6 дугаар зүйлийн 5 дахь хэсэгт “Төрөөс гадаадын иргэн, хуулийн этгээд, харьяалалгүй хүнд газрыг төлбөр, хугацаатайгаар болон хуульд заасан бусад болзол, журмаар ашиглуулж болно” гэж заасны дагуу газар ашиглах эрх бүхий субьект нь Монгол Улсын иргэн болон гадаадын иргэн, харьяалалгүй этгээд, Монгол Улсын болон гадаад улсын хуулийн этгээд, гадаад улсын дипломат төлөөлөгчийн болон консулын газар, олон улсын байгууллагын төлөөлөгчийн газар байна.

Эдгээр эрхийн ялгааг Монгол Улсад хүчин төгөлдөр мөрдөж буй хуулийн агуулга, зохицуулалтыг үндэслэн мэдээлсэн тул өмчийн эрхзүйн сонгодог ойлголт, зарчмаас зөрүүтэй болохыг анхаарна уу. Хуулийг бүрэн эхээр үзэх бол энд дарна уу. 

Эх сурвалж: Хууль зүйн үндэсний хүрээлэн;

"Монгол өмгөөлөгч" Хууль зүйн фирм

Бусад мэдээ

Нэр бүхий шүүгчдэд холбогдох сахилгын хэргийг түдгэлзүүлжээ

Нэр бүхий шүүгчдэд холбогдох сахилгын хэргийг түдгэлзүүлжээ

Монгол Улсын Үндсэн хуулийн цэцийн гишүүний 2023 оны зургадугаар сарын 27-ны өдрийн 67 дугаар тогтоо

Жүдо бөхийн өсвөрийн Ази тивийн аварга болсон А.Дуламсүрэндээ баяр хүргэе

Жүдо бөхийн өсвөрийн Ази тивийн аварга болсон А.Дуламсүрэндээ баяр хүргэе

Узбекистаны нийслэл Ташкент хотод жүдо бөхийн өсвөр үеийнхний Ази тивийн аварга шалгаруулах тэмцээн

Чинбаяр Ч.
Чинбаяр Ч.