Орон даяар 3-р ангиас англи хэлний хичээл зааж эхлэхтэй холбогдуулан сурах бичиг, хөтөлбөр болон багш нарыг бэлтгэх чиглэлд Их Британи улстай амжилттай хэлэлцээ хийлээ. 

Тухайлбал, Pearson, Efekta зэрэг байгууллагуудтай хамтран, хиймэл оюунд суурилсан технологийн тусламжтайгаар хүүхэд бие даан англи хэлээ сайжруулах ухаалаг шийдлүүдийг нэвтрүүлж байна. 

Мөн англи хэлний боловсролыг дэмжих зорилгоор Их Британи улсаас амласан санхүүжилтийн үлдэгдлийг шийдвэрлэх, бэлтгэл ажлыг шуурхайлах тал дээр талууд санал нэгдлээ.

Энэ хүрээнд Кэмбрижтэй хамтран сургалтын хөтөлбөрийн шинэчлэл болон МУБИС-ийн менежментийг сайжруулах гэрээ хэлцлүүдийг хийлээ. 

Мөн Британийн EQA компанитай хамтран үнэлгээний системийг цэгцэлж, цаашид ЭЕШ-ыг олон улсын SAT тогтолцоонд шилжүүлэх, Times Higher Education-тэй хамтран их сургуулиудыг их өгөгдөлд суурилан эрэмбэлэх зэрэг чухал шинэчлэлүүдийг хийхээр тохиролцлоо.